lettre-ouverte-de-l’ancien-senateur-cheramy-au-peuple-haitien

Lettre ouverte de l’ancien sénateur Cheramy au peuple Haïtien

Mercredi 30 septembre 2020 ((rezonodwes.com))–L’ex-sénateur Antonio Cheramy jouant à l’avant-gardiste, attire l’attention du peuple haitien sur les multiples violations de la Constitution par le président Jovenel Moise.

M. Cherami rappelle que les jours de M. Moise sont comptés et n’a pas plus que 5 mois à passer au pouvoir au plus tard le 7 février 2021.

LÈT TOU LOUVRI, ANSYEN SENATÈ REPIBLIK LA, ANTONIO CHERAMY, POU PÈP AYISYEN AN

Mèkredi, 30 sektanm 2020

Nou pa Mabouya; nou pa ka Modere!

Depi lè mwen te antre nan Sena Repiblik la, mwen te sèmante pou m respekte konstitisyon an ki se manman lwa peyi a, ki se sèl bousòl ki dwe òganize lavi nan tout enstitisyon lakay nou an jeneral ak 3 pouvwa Leta yo an patikilye!

Sa lakoz chak lè m nan yon sitirasyon kote mwen wè youn nan pouvwa yo krache sou manman lwa peyi a, mwen toujou met kanson m nan tay mwen nan estrateji palmantè m pou m fè respekte sa lalwa di. Konsa, nou chire bidjè kriminèl egzekitif sansi an te vle fè pase kòm lwa finans pou te vin toupizi mas defavorize k ap kwoupi nan mizè chak jou pi plis la. Epi, nou te kanpe anfas kabinè malatchong ki te gen minis san dechaj ak minis ki te vyole dwa grandètmajè peyi a nan fè mèsènè kriminèl antre sou tèritwa a pou te vin bay sitwayen k ap revandike yon lòt kalte lavi bal nan tèt!

Pandan tout moman rezistans sa yo, pèp ayisyen an ak tout Sektè konsekan nan lavi nasyonal la ki te toujou pote sipò yo nan batay pou respekte konstitisyon peyi a.

Li enpòtan pou m raple nou, mwen se youn nan ansyen senatè ki te nan gwoup 4 senatè ki te konpoze blòk enstitisyonèl Sektè Demokratik ak Popilè a, konsa tou mwen se Kòdonatè Jeneral  ML ( MATRIS LIBERASYON ) an.

Depi aprè manda m te fini nan palman an kòm senatè repiblik la; mwen angaje m, kòm avangadis, pi plis toujou nan veye tout zak pouvwa Egzekitif la ap poze ki pa bobo ak manman lwa peyi a.

Depi lè rejim PHTK a pran pouvwa a ak konplisite kèk diplomat rasis ki nan entènasyonal kominotè a, rejim nan pa janm rate okazyon pou l manifeste pozisyon pwennfèpa li kont enterè pèp ayisyen an. Aprè tout zak reprezay rejim sa fè tankou: masak nan katye popilè yo ak lavi chè k ap pete fyèl kouch ki pi pòv yo e k ap koukouman nan malsite yo malgre nou wè dola meriken an ap plonje desann san kou lavi a pa janm bese, mete ak ensekirite pwograme a, nou kwè se sèl yon mabouya ki ka gen pozisyon modere nan konjonkti a.

Advertisement

Pwoblèm estriktirèl peyi a ap viv nan dènye tan sa yo, sitou ak koze pandemi ki frape prèske tout pèp sou latè yo, sa fè nou santi nan tout konpatiman kò nou konsekans 4.2 milya dola vèt rejim kòwonpi sa gagote a genyen sou lavi ak avni pèp ayisyen an!
Sa lakoz nou pa ka modere sou konviksyon nou pou pwosè masak yo ak petwokaribe a fèt jan pèp ayisyen an revandike sa.

Kòm avangadis ki se youn nan pèsonalite Sektè Demokratik ak Popilè a, ki se kòdonatè jeneral MATRIS LIBERASYON an, nou prè pou n kolabore ak tout gwoup ak pèsonalite pwogresis ki vle peyi a reprann dwa grandètmajè l kidonk sòti anba grif peyi enperyalis rasis yo; menm jan tou n ap kolabore ak tout aktè ki vle manman lwa peyi a respekte nan egzije demisyon san kondisyon Jovenel MOÏSE nan tèt peyi a, e derasinen rejim sanginè PHTK a aprè plizyè zak vyolasyon konstitisyon peyi a menm anvan manda l fini 7 fevrye 2021 k ap vini la pou peyi a definitivman pran wout pwogrè ak modènite nan Diyite!

Mwen pa Mabouya; sa lakoz mwen paka modere sou revandikasyon pèp ayisyen!

Antonio Cheramy,
ansyen senatè Repiblik Dayiti

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *