peyi-etazini-pwononse-l’-sou-pwoje-refom-konstitisyonel-prezidan-jovenel-moise-la

Peyi Etazini pwononse l’ sou pwojè refòm konstitisyonèl prezidan Jovenel Moïse la

Peyi Etazini, a travè anbasad li ki nan peyi Dayiti, bay pozisyon li sou pwojè refòm konstitisyonèl prezidan Jovenel Moïse ap klewonnen an.

Si chèf leta a, nan adrès li te fè avèk nasyon an samdi pase a, te deklare chanjman Konstitisyon se yon kondisyon preyalab pou eleksyon yo òganize nan peyi a, anbasad amerikèn nan peyi a pa t pran tan pou rekadre, nan dat mèkredi 28 oktòb 2020 an, nan yon twit, premye sitwayen peyi a.

«Enstitisyon demokratik ayisyèn yo ta dwe detèmine mekanis legal ki apwopriye pou chanjman konstitisyonèl la, ak kontribisyon sosyete sivil la», se sa nou li sou kont Twitè anbasad la ki kwè Konstitisyon an pa ka chanje san patisipasyon òganizasyon yo ki nan sosyete sivil la.

Advertisement

Yon konpòtman otoritaris Me. Bernard Gousse te deja kritike kay chèf leta a. «Deba yo te dwe fèt sou liy direktris Konstitisyon an avan travay redaksyonèl la. Malerezman, chèf leta a pa kreye kondisyon pou sa», se deklarasyon M. Gousse ki t’ap patisipe nan ribrik «Le Point» sou televizyon Métropole, lendi 26 oktòb la.

Alòske pouvwa lejislatif la konsantre nan men prezidan Jovenel Moïse, administrasyon amerikèn nan raple chèf leta a: «Palman ayisyen an dwe re-etabli pi vit ke posib pou Ayiti retounen sou yon chemen demokratik».

Wilner Jean

Laisser un commentaire

Votre adresse e-mail ne sera pas publiée. Les champs obligatoires sont indiqués avec *