plis-pase-3-milyon-ayisyen-ap-viv-san-“batiste”,-dapre-direkte-achiv-nasyonal-la,-wilfrid-bertrand

Plis pase 3 milyon Ayisyen ap viv san “Batistè”, daprè direktè Achiv nasyonal la, Wilfrid Bertrand

Ayè mèkredi 25 novanm 2020 an, chèf leta a, Jovenel Moïse, ak premye minis peyi a, Joseph Jouthe, te chita pale ak plizyè lòt otorite anndan peyi a, epi remèt ak responsab Ofis nasyonal idantifikasyon an (ONI), plizyè materyèl ak direktè enstitisyon an, Jude Jacques Elibert, pou kontinye fè livrezon kat yo pi vit anndan peyi a.

Nan sikonstans lan, lokatè palè nasyonal la, Jovenel Moïse, te pwofite kesyone plizyè nan otorite ki te prezan yo, pou konnen konbyen kat ki gentan enprime, epi ki rezon ki lakòz plizyè lòt sitwayen nan seksyon kominal yo paka fè kat yo.

Pou te reponn Jovenel Moïse, responsab ONI an, mesye Jude Jacques Elibert fè konnen ONI gen kapasite anrejistre 90 000 mil kat chak jou, epi livre 56 000 kat jou. Men enstitisyon an anrejistre sèlman 16 000 kat paske anpil nan sitwayen yo pa gen batistè, yon papye enpòtan, paske san li, yo pap ka fè kat la.

Advertisement

Yon pwoblèm ki ta pral pouse Prezidan Moïse kesyone direktè achiv nasyonal la, Mesye Wilfrid Bertrand, sou ka moun ki pa gen batistè yo.

Direktè achiv nasyonal la di prezidan an se depi 37 tan l ap poze pwoblèm sa. Mesye Bertrand di gen plis pase 3 milyon moun ki pa gen batistè, anndan peyi a kou aletranje, poutan yo peye taks menm jan ak tout moun.
Daprè Wilfrid Bertrand se paske isit pa gen anrejistreman depi moun nan fèt, se youn nan pwoblèm ki koz anpil sitwayen pa gen batistè.

Prezidan Jovenel Moïse montre li detèmine pou pèmèt tout ayisyen kapab genyen batistè paske menm bèt yo gen papye.

Jeff Jean Joseph

Laisser un commentaire

Votre adresse e-mail ne sera pas publiée. Les champs obligatoires sont indiqués avec *