plizye-santen-moun-foule-beton-an-pou-di-aba-ensekirite-nan-peyi-a

Plizyè santèn moun foule beton an pou di aba ensekirite nan peyi a

Jedi 10 desanm nan make jounen entènasyonal dwa moun. Nan sans sa, plizyè òganizasyon nan sosyete sivil la te deside òganize yon mach jodi a, pou di non ak ensekirite k ap taye banda nan peyi a.

Yo se plizyè santèn sitwayen ki sòti nan diferan sektè anndan peyi a ki te foule beton an pou vin rele, epi mande otorite yo mete yon fren a sa k ap pase nan peyi a.

Nan mach sa te gen plizyè kwen kote sitwayen yo te reyini nan mitan jounen an. Bò Teleko pon Moren se youn nan kote yo ta pral demare, avan yo te pran direksyon Ministè Jistis ak Sekirite Piblik. Pankat nan men, sitwayen yo te gen plizyè mesaj ki te afiche “non ak kidnapinn, non ak ensekirite, sispann maspinnen zantray nou”.

Moun yo te pwofite de mach sa pou denonse Jovenel Moïse ki dènye jou sa yo, pran plizyè dekrè, tankou dekrè pou kreye ANI, ki se Ajans Nasyonal Entèlijans. Yo te pwofite boule anpil kawotchou. “Se gras ak barikad nou te fè mouvman 1986 la, prezidan Jovenel Moïse paka vle prive nou de dwa pou n fè revandikasyon nou pase

Advertisement
”, se konsa kèk reponsab òganizasyon te pale.

Polisye yo yon lòt fwa ankò, afiche yon konpòtman anti demokratik, kote yo ta pral anpeche sitwayen yo delivre mesaj yo devan ministè jistis. Pa twò lwen ministè a, Gédéon Jean ta pral delivre mesaj sa : “Nou vle viv, aba ensekirite, aba kidnapinn”.

N ap raple se pa sèl potoprens ki te gen mach pou di aba ensekirite k ap fè raj anndan peyi a. Nan Depatman Latibonit, Senatè Youri Latortue ak plizyè manb sektè demokratik ak popilè a te mache tou pou di aba ensekirite nan peyi Dayiti.

Jeff Jean Joseph

Laisser un commentaire

Votre adresse e-mail ne sera pas publiée. Les champs obligatoires sont indiqués avec *